ದೀಪ

 

Click here for audio recitation

ಹಣತೆ

ಕತ್ತಲಿನಾ ಸತ್ಯಕ್ಕೆ ಬೆಳಕೆಂಬ ಮಿತ್ಯ

ಏನಿಲ್ಲದಿರೆ ನಿಗೂಡವಾಗಿ ಇದ್ದದ್ದು

ಒಮ್ಮಿಂದೊಮ್ಮೆ ಏನೋ ಕರಗಿಸಿ ಸೋಲಿಸಿ

ಸ್ಪಶ್ಟತೆಯ ಕಲ್ಪಾನಾ ಲೋಕಕ್ಕೆ 

ಕರೆದೊಯ್ವ ದೀಪ ನನ್ನ ಹಣತೆಯ ದೀಪ

ತನ್ನಡಿಗೆ ಕತ್ತಲಿನ ಮೆಟ್ಟನ್ನು ಹಚ್ಚಿ

ಸುತ್ತಲಿಗೆ ಬೆಳಕೆಂಬ ಭ್ರಮೆಯ ಚೆಲ್ಲಿ

ನೋಡಿದ್ದ ನಂಬೆಂದು ತಿಳಿಯಹೇಳುತ

ತೋರಿಸಿ ನಂಬಿಸಿ ಸಾಂತ್ವನಗೊಳಿಸುವ

ಭರವಸೆಯ ದೀಪ ನನ್ನ ಹಣತೆಯ ದೀಪ

ಬರಿಯ ಮಣ್ಣಿನ ಬಟ್ಟಲು ನೀನಾಗಿದ್ದು

ಎಣ್ಣೆ ಬತ್ತಿಯ ತುಂಬಿ ಬಳಕುತ್ತ ಬೆಳಕಿತ್ತು

ಮಾಯೆಗೆ ಸಿಲುಕಿಸಿ ಸಂತಸವನೀಯುತ್ತ

ಹೆದರದಕೆ ಹೆದರಿಸಿ ಧೈರ್ಯವನು ತುಂಬುವಾ

ಕಪಟಿ ನೀನಾದೆ ನನ್ನ ಹಣತೆಯ ದೀಪ

ದೀಪವೋ ನೀ ನಿರ್ಮಿಸಿದ ಬೆಳಕಿನಾ ದ್ವೀಪವೋ

ಸುತ್ತಲಿನ ಕತ್ತಲು ಕಡಲೋ ಕಾರ್ಮುಗಿಲೋ

ವಿಸ್ತಾರವೇನೋ ಕಡಲು ಆ ಮುಗಿಲಿಗೆ

ಬಂಧಿಸಿ ಬಿಡಗೊಡದೆ ಬಿಗಿದಪ್ಪಿ ನಿಲ್ಲಿಸಿ

ಹಿಡಿದಿಟ್ಟಿರುವ ದೀಪ ನನ್ನ ಹಣತೆಯ ದೀಪ

ಉರಿಉರಿದು ಕರಗುತ್ತ ಮೆಲ್ಲನೆ ನೀ ಜಾರುತ್ತ

ನಿನ್ನಾಟ ಮುಗಿಸಿ ಕತ್ತಲಿಗೆ ದೂಡುತ್ತ

ನನ್ನ ಪರಿವೆಯೆ ಇರದೆ ನೀ ದೂರ ಸರಿದೆ

ಮತ್ತೆ ಕವಿಯಿತು ಸುತ್ತಲಿಗೂ ಕಪ್ಪನೆಯ ಸತ್ಯ

ಕಣ್ಮರೆಯಾದೆಯಾ ಜಾಣ ಹಣತೆಯ ದೀಪ

- ನಾ ಶ್ರೀ ಮೋ