ಚುನಾವಣೆ

 

🔊Audio link

ಆಳುವವರು ಬೇಕೆಮಗೆ ಆಳುವವರು

ಆಂಗ್ಲರು ತೊಲಗಿ ಸ್ವಾತಂತ್ರ ಬಂದರೂ

ಆಳುವವರು ಬೇಕೆಮಗೆ ಆಳುವವರು

ಗುಲಾಮಗಿರಿ ಮಾಡಿ ‌ಸ್ವಾತಂತ್ರದ ಛಲಮರೆತು

ಆಳಾಗ ಬಯಸಿ ಆಳುವವರ ಹಿಂಬಾಲಿಸಲು

ಆಳುವವರು ಬೇಕೆಮಗೆ ಆಳುವವರು

ಐದುವರುಷಕ್ಕೊಮ್ಮೆ ದರುಶನವನೀವ

ಐದುವರುಷದಲಿ ಮೇಯ್ದು ಕೊಬ್ಬುವ

ಆಳುವವರು ಬೇಕೆಮಗೆ ಆಳುವವರು

ಪಾದಯಾತ್ರೆ, ಭಾಷಣಗಳ ಮಾಡಿ

ಇನ್ನೈದು ವರುಷ ತಾ ಪೂಜಾರ್ಹನೆಂಬ

ಆಳುವವರು ಬೇಕೆಮಗೆ ಆಳುವವರು

ಆಳಾಗುವೆ ನಿಮಗೆ ನಾನೆಂದು ನಕ್ಕು ನುಡಿದು

ಚಿಕ್ಕ ರೊಕ್ಕವನ್ನು ನಮಗೆ ನೆಕ್ಕಿಸುವ

ಆಳುವವರು ಬೇಕೆಮಗೆ ಆಳುವವರು

ಕೆಂಬಣ್ಣ ದೀಪ ಹೊತ್ತು ಸೈರನ್ನಿನ ಕಹಳೆಯೂದಿ

ಸರಕಾರದ ಕಾರಿನಲ್ಲಿ ರಕ್ತಕಾರುತ್ತ ರಂಜಿಸುವ

ಆಳುವವರು ಬೇಕೆಮಗೆ ಆಳುವವರು

ಯೋಜನೆಗಳೆಂದು ದುರಾಲೊಚನೆ ಮಾಡಿ

ಕಪ್ಪು ಹಣವನಿಲ್ಲಿ ಅಲ್ಲಿ ಕೂಡಿಡುವ

ಆಳುವವರು ಬೇಕೆಮಗೆ ಆಳುವವರು

ನಮ್ಮಂತಹ ಪ್ರಜೆಗಳಿಗೆ ಪ್ರಭುವಾಗಿ ಮೆರೆಯಲು

ಪ್ರಜಾಪ್ರಭುತ್ವದ ಸೋಗುಹಾಕಿ ಕುಣಿಸುವ

ಆಳುವವರು ಬೇಕೆಮಗೆ ಆಳುವವರು

ಕೋಮು ಬೆಳಿಸಿ ಹಗೆಯ ಹೊಗೆಯ ತುಂಬಿ

ಹಗರಣಗಳ ಮಾಡಿ ನಮ್ಮನ್ನಳುಸುವ

ಆಳುವವರು ಬೇಕೆೇ ಜಾಣ, ನಮಗೆ ಆಳುವವರು?